Parveen Shakir

Gai Janam Ki Sada

گئے جنم کی صدا

وہ ایک لڑکی

کہ جس سے شاید میں ایک پل بھی نہیں ملی ہوں

میں اُس کے چہرے کو جانتی ہوں

کہ اُس کا چہرہ

تُمھاری نظموں،تُمھارے گیتوں کی چلمنوں سے اُبھررہا ہے

یقین جانو

مُجھے یہ چہرہ تُمھارے اپنے وُجود سے بھی عزیز تر ہے

کہ اُ س کی آنکھوں میں

چاہتوں کے وہی سمندر چُھپے ہیں

جو میری اپنی آنکھوں میں موجزن ہیں

وہ تم کو اِک دیوتا بناکر،مِری طرح پُوجتی رہی ہے

اُس ایک لڑکی کا جسم

خُود میرا ہی بدن ہے

وہ ایک لڑکی____

جو میرے اپنے گئے جنم کی مَدھُر صدا ہے!